Күһүн сахаларга уйгу-быйаҥ кэмэ, сир аһа ситэн, оҕуруот аһын хомуйан быйаҥ кэмэ буолар, ол иһин өбүгэлэрбит “Күһүҥҥү киһи күлбүтүнэн, сааскы киһи салбаммытынан” диэн бэрт бэргэн өс хоһоонун этэн ааспыттар эбит. Чахчы даҕаны күһүн кэрэ көстүүтүнэн, көмүс кырааскатынан, уйгулаах быйаҥынан дьыл   саамай үтүө кэмнэриттэн биирдэстэрэ.

Балаҕан ыйын 16 күнүгэр Модут орто оскуолатыгар  “Күһүҥҥү киһи күлбүтүнэн” быыстапка – дьаарбаҥка буолан ааста. Бу быыстапка-дьаарбаҥка сыала: кылаас, оскуола коллективын  биир дьыалаҕа түмүү, оҕону атыы-эргиэн эйгэтигэр сыһыарыы. Бу тэрээһин сылга биирдэ ыытыллар үтүө үгэскэ кубулуйда, оҕо-аймах, төрөппүт уонна учуутал үөрэ күүтэр биир бэлиэ тэрээһинэ буолар. Оҕолор араас дьикти көстуулээх оҕуруот аһын, айылҕа матырыйаалынан бэйэ оҥоһуктарын дьүүллүүр сүбэҕэ көрдөрдүлэр. Дьон-сэргэ көмүс күһүнү уруйдаан, быйаҥнаах үүнүү минньигэс астарын үөрэ-көтө атыылаһан, астынан дьиэлээтилэр.